Bandung, Info Burinyay – Gedung Kesenian Rumentang Siang bakal ngadadak rame deui unggal Salasa ti 16 Séptémber nepi ka Désémber 2025. Dina éta waktos, Longser Bandung (LOBA) mawa karya anyar: “Kabayan Ngalalana”. Sajaba ti éta, panggung legendaris ieu ogé bakal jadi saksi lahirna kolaborasi anyar anu ngahiji antara tradisi jeung modérenitas.
Produksi ieu digarap ku Rosyid E. Abby salaku sutradara jeung Agus Injuk salaku asistén. Apip Catrix mingpin produksi. Ku kituna, kolaborasi ieu henteu ngan saukur nyusun panggung, tapi ogé ngajak panonton mikirkeun deui hubungan urang Sunda jeung tradisi.
Sakitu lila, Kabayan geus jadi tokoh kolektif urang Sunda. Anjeunna polos, wijaksana, ogé lucu. Sanajan kitu, dina ieu pementasan tokoh Kabayan béda. Anjeunna jadi Profesor Kabayan anu nyieun mesin waktu.
Ku mesin éta, Kabayan ngalalana ti jaman ka jaman. Anjeunna nyaksian Bandung Purba nalika Sangkuriang jeung Dayang Sumbi. Salajengna, anjeunna ngumbara ka Batavia jaman Kompeni. Tungtungna, anjeunna nyanghareupan taun 2750 nalika Bandung jadi dano kusabab bencana. Ku sabab éta, carita anu disuguhkeun henteu saukur fantasi, tapi refleksi ngeunaan hubungan urang jeung waktu.
Rosyid E. Abby
Rosyid E. Abby nerangkeun:
“Carita ieu henteu ukur hiburan. Ieu ajakan pikeun mikirkeun kumaha urang nyambungkeun bihari, ayeuna, jeung mangsa datang.”
Dua Warisan, Hiji Dialog
Longsér jeung Sandiwara Sunda asalna beda jalan. Longsér tumuwuh ti masarakat, improvisatif, egaliter. Sandiwara Sunda sabalikna boga struktur dramatik anu leuwih rapih. Salian ti éta, Sandiwara ogé biasana ngusung narasi moral jeung konflik sosial.
Ku kituna, “Kabayan Ngalalana” ngahijikeun dua gaya éta dina hiji panggung. Sajaba ti éta, pementasan ogé masihan roh anyar ngaliwatan musik karawitan, tari tradisi, jeung gerak teatrikal. Malah deuih, unsur silat dipadukeun jeung koreografi modern. Hasilna, panonton meunangkeun tontonan anu multisénsorial.
Agus Injuk nandeskeun:
“Longsér téh ruang pikeun seuri bari nganteur kritik sosial. Nalika digabung jeung Sandiwara Sunda, urang meunangkeun éstétika anyar. Ieu tetep Sunda, tapi leuwih deukeut jeung jaman kiwari.”
Leuwih jauh deui, kakuatan séjén nyaéta kolaborasi. Loba komunitas seni ti Bandung milu. Di antarana: Sanggar Sawarna Bandung, Sanggar Senapati, Lamda Art Production, Sanggar Alam Purnama, Komunitas Bumi Sastra, Sanggar Pratala Tandang, Creamerbox, Kotak Hitam Audiomotif, jeung Kelompok 282.
Ku lantaran éta, panggung henteu ngan saukur jadi tempat pintonan. Tapi ogé jadi ajang papanggih lintas generasi. Seniman sepuh ngabagi pangalaman. Generasi ngora masihan sumanget anyar. Sajaba ti hiburan, ieu ogé ngajarkeun pentingna nyambungkeun tradisi jeung inovasi.
Salah saurang anggota Sanggar Alam Purnama nyebutkeun:
“Kami reueus bisa milu. Ieu lain ukur hiburan, tapi warisan budaya pikeun barudak urang engké.”
Dina jaman digital, hiburan instan gancang nyebarkeun pangaruh. Sanajan kitu, “Kabayan Ngalalana” nunjukkeun yén seni tradisi henteu kudu éléh. Ku kituna, pementasan ieu ngajawab rasa hariwang yén budaya Sunda bisa leungit.
Apip Catrix ngajelaskeun:
“Kabayan Ngalalana henteu eureun di nostalgia. Ieu téh lalampahan. Tradisi kudu terus ngalalana, nyambungkeun jaman baheula jeung hareup.”
Ku sabab éta, unggal Malem Rebo di Gedung Rumentang Siang, masarakat tiasa ngarasakeun karya anu unik. Sajaba ti éta, pementasan ieu ngajak panonton pikeun seuri, mikir, jeung boga rasa asih ka budaya Sunda.
Dina waktos anu sarua, tradisi henteu saukur titik ahir. Tradisi téh lalampahan anu kudu terus dipiara. Kabayan Ngalalana ngabuktikeun yén budaya Sunda moal eureun. Anjeunna bakal terus ngalalana, mapay waktu, sarta ngajawab tantangan jaman. (éép nr)